Соғлиқни сақлаш вазирлигида IT-Med ходимларининг ЖССТнинг Ўзбекистондаги ваколатхонаси аъзолари билан ишчи учрашуви бўлиб ўтди. Суҳбат чоғида томонлар фаолият йўналишлари ҳамда амалга оширилаётган лойиҳалар ҳақида маълумот алмашишди, шунингдек, бир қатор долзарб масалалар бўйича ўзаро манфаатдорлик масалалари муҳокама этилди.

Хусусан, IT-Med томонидан «Электрон поликлиника» ва «Имтиёзли йўлланма» тизимларининг минтақавий қамровини ошириш ва ривожлантириш стратегияси тўғрисида айтиб ўтилди. Шунингдек, компания томонидан яқин 4 йил ичида республикада Ягона рақамли соғлиқни сақлаш платформаси ва интерактив тиббий хизматлар учун мобил иловани яратиш режалаштирилаётган бўлиб, у фуқароларнинг туғилган пайтидан бошлаб барча тиббий маълумотларини ўз ичига олади.

Бундан ташқари, Ўзбекистонда тиббиёт муассасаларида қоғоз шаклида ҳужжат айланишини бартараф этишга, уларнинг компьютер ва маҳаллий тармоқлар билан жиҳозланиш даражасини, шунингдек, тиббиёт ходимларининг компьютер саводхонлигини оширишга катта эътибор қаратилди.

ЖССТ вакиллари электрон ҳужжат айланиши, бирламчи тиббий хизматларнинг сифат кўрсаткичлари, маълумотлар алмашиш сертификатларини яратиш ва ҳоказоларни амалга оширишда ўз хиссасини қўшишга ва халқаро тажриба билан алмашишга тайёр эканликларини билдирдилар.